Remate da primeira fase da campaña Proba en Galego 2013 e comezo da segunda

Vén de rematar a primeira fase da campaña Proba en Galego na que participan 30 comercios e pequenas empresas de Pontevedra que asinaron, no mes de marzo, un decálogo de compromisos coa lingua galega.

Estes compromisos están estruturados en tres bloques que se desenvolverán ao longo do ano; na primeira fase consistiron en:

  • utilizar do galego nos avisos, por megafonía ou escritos, e nos carteis temporais que precise o negocio;

  • atender á clientela de entrada en galego, para poñer en práctica a oferta positiva á que fai referencia o Plan Xeral de Normalización da Lingua Galega;

  • participar na campaña de publicidade en medios locais. Os espazos publicitarios levarán a sinatura final “Proba en Galego”;

  • usar unha tarxeta que sirva de presentación cara ao público de cada empregado/a, e que coa mensaxe “proba a falarme en galego” convide á clientela ao uso activo da lingua;

  • empregar o blog da campaña para inserir novas relacionadas co uso do galego nos comercios.

As empresas e comercios que se comprometeron a cumprir estas premisas participaron nunha campaña de publicidade no xornal dixital Pontevedra Viva. Para xustificar estes compromisos as empresas achegaron fotos, gravacións, carteis, anuncios, etc.

Durante o verán desenvolverase a seguinte fase da campaña, que dará acceso á publicidade nas pantallas led situadas nas rúas do centro da cidade. Á vez, os comercios e pequenas empresas ampliarán os seus compromisos coa lingua; ademais de manter os da primeira fase, realizarán en lingua galega, como mínimo durante o ano que dura a campaña, o resto da publicidade do comercio e solicitaranlle á xestoría que os asesora o uso da lingua galega nas relacións comerciais.

Entra en Quen somos? Para coñecer as firmas comerciais que participan en Proba en Galego.

Acto de sinatura dos compromisos da campaña Proba en Galego 2013

O Pazo de Mugartegui acolleu onte pola noite o acto de sinatura pública do decálogo de compromisos coa lingua de trinta comercios e pequenas empresas de Pontevedra.

Os obxectivos da campaña Proba en Galego son:

• Dinamizar o uso do galego como lingua normal de comunicación no comercio e na pequena empresa
• Implicar as persoas que traballan no sector do comercio e da pequena empresa na mellora do uso do galego coa clientela e coas empresas provedoras
• Ofrecer espazos de reflexión e traballo para mellorar a calidade da lingua e a seguridade no seu uso no sector
• Estimular a clientela falante de galego para que manteña a súa lingua nas relacións comerciais
• Animar a clientela que non fala galego habitualmente a que probe a facelo
• Facer visible o uso da lingua galega nas relacións comerciais que se establecen na cidade
• Darlles continuidade ás campañas específicas para incrementar o uso do galego no comercio local e na pequena empresa

 

I Concurso de Proxectos de Publicidade Comercial en Galego do Concello de Santiago de Compostela

O Concello de Santiago vén de convocar o I Concurso de Proxectos de Publicidade Comercial en Galego. Os obxectivos da convocatoria son promover o uso do galego na comunicación do sector socioeconómico compostelán e engadir valor e rendemento ás iniciativas publicitarias a través da intervención dos profesionais do deseño e da aplicación da creatividade e da innovación aos soportes e ao seu contido.

A convocatoria está aberta a empresas ou profesionais do deseño e da comunicación. Podedes consultar as bases neste web:

http://santiagodecompostela.org/lingua/concurso_publicidade_comercial/

Agardamos que esta información sexa do voso interese. Animádevos a participar!

30 empresas de Pontevedra asinan un decálogo de compromisos coa lingua galega

Hoxe, ás 12 horas na casa do concello, asinan un decálogo de compromisos coa lingua galega parte das trinta pequenas empresas de Pontevedra que participan activamente na nova iniciativa da campaña Proba en galego!.

O documento que se asina hoxe implica asumir os seguintes compromisos nas relacións comerciais:

  1.  O galego será a lingua empregada nos avisos, por megafonía ou escritos, e carteis temporais que precise o negocio a partir da data de sinatura deste documento.
  2. No comercio comezarán a atención á clientela en galego, para poñer en práctica a oferta positiva á que fai referencia o Plan Xeral de Normalización da Lingua Galega.

  3. Participarán na campaña de publicidade en radio, cun paquete de 60 cuñas co texto íntegra e exclusivamente en galego. As cuñas levarán a sinatura final “Proba en Galego”.

  4. Realizarán en lingua galega, como mínimo durante os vindeiros 6 meses, o resto da publicidade do comercio.

  5. Solicitaranlle á xestoría que asesora o comercio o uso da lingua galega nas súas relacións comerciais.

  6. Utilizarán a lingua galega nas relacións profesionais do comercio coas empresas provedoras e auxiliares.

  7. Demandarán de todas as administracións públicas documentos e atención en lingua galega, para todos os trámites administrativos que teñan que ver coa empresa.

  8. O persoal que traballa no comercio levará un cartón de cortesía que, coa imaxe da campaña “Proba en galego”, servirá de presentación e de convite a utilizar o galego.

  9. Participarán no blog “Proba en galego”, específico para esta campaña.

  10. Os/as representantes dos comercios asinarán publicamente o compromiso coa lingua galega que forma parte da campaña “Proba en galego”.

Ás primeiras empresas que forman parte activa da campaña desde 2011 estanse a sumar novas firmas comerciais. O grupo que asina hoxe os compromisos está formado por: Ábaco (mobiliario e interiorismo), Casa Baños, Centro de ensino ENOT, Deportes GoleadaDicenfot, EraComunicación, Ernesto Filgueira, Estouche Ben!, A Formiga no Carreiro, Gaia Animación, Libraría Paz, Librería Depapeis, Lourdes Sampedro (lencería), Olbe Téxtil, Olga Otero (zapatería), Peral Moda, Quercus (armarios e vestidores), Rocío Fazanes (boutique), Tapicería Tranchero, Ultramarinos O Cisne e Volvoreta (moda infantil).

Proba en galego é unha campaña da Concellaría de Normalización Lingüística do Concello de Pontevedra para dinamizar o uso do galego na pequena empresa e no comercio locais. Esta nova iniciativa dálle continuidade ao labor que desenvolve o Concello de Pontevedra para visibilizar e incrementar o uso da lingua galega na pequena empresa, con actuacións específicas que se veñen realizando desde o ano 2006.

Comercios que dispoñen dos descontos para o Cine en galego en Cinebox Vialia

A Concellaría de Normalización Lingüística do Concello de Pontevedra organiza un ano máis o programa Maio, Mes da Lingua, que no 2012 chega a súa oitava edición.

Unha das actividades máis destacadas é o Cine en galego, para o que os comercios que forman parte activa da campaña Proba en galego dispoñen de vales desconto, sobre o prezo da entrada en billeteira, para as dúas películas que se van proxectar en CineBox Vialia:

Tamén a chuvia (3,10 e 17 de maio, ás 22 h)

Engurras (17 de maio, ás 17 e 19 h)

Dentro desta programación de cine en galego proxectaranse outras peliculas no Teatro Principal, con entrada libre ata completar aforo:

Pa negre (9 de maio, ás 21 h)

Vikingland (29 de maio, ás 21 h)

A pedra do lobo (31 de maio, ás 21 h)

Os comercios que dispoñen destes vales son:

  • Dicenfot fotografía. Rúa Cruz Gallástegui, 1
  • Enot. Centro de ensino. Rúa dos Ferreiros, 22, baixo
  • Ernesto Filgueira. Praza de Méndez Núñez, 17
  • Estouche Ben! Centro de terapias. Rúa Xosé Millán, 2
  • Libraría Paz. Rúa Peregrina, 29
  • O Cisne ultramarinos. Rúa Real, 15
  • Olbe Téxtil. Rúa Santa Clara, 10
  • Peral Moda. Praza de Curros Enríquez, 14
  • Quercus. Rúa da Seca, nº 18, baixo

Remate das charlas

PROBA EN GALEGO
Presentación do proxecto «Abertos ao galego» da Mesa pola Normalización Lingüística
Martes 24 de abril, ás 21 horas
Colexio de Xestores Administrativos (Blanco Porto, nº 9)

As actividades da campaña Proba en galego, de promoción do galego no comercio local, rematan coa presentación do proxecto Abertos ao galego, que A Mesa desenvolve para promover o uso do galego no ámbito empresarial. Carlos Callón, o presidente da asociación, será o encargado de explicar o proxecto. 

Abertos ao Galego colabora coas empresas que apostan pola nosa lingua, sendo unha ferramenta para o apoio e promoción da actividade empresarial. Mais Abertos ao Galego tamén constitúe un espazo para a reflexión sobre as potencialidades do galego no ámbito económico e sobre o papel dos consumidores e das consumidoras na potenciación da lingua galega.

Por outra banda, en Abertos ao Galego hai espazo para empresas moi diversas e de ámbitos moi diferentes, o que permite crear unha rede de colaboración, que conta co asesoramento e a colaboración da Mesa pola Normalización Lingüística, unha entidade con máis de 25 anos experiencia no ámbito da dinamización lingüística. 

Roberto Rivas (Adega Moraima). Experiencia práctica de uso do galego

Martes 10 de abril, ás 21 horas

Colexio de Xestores Administrativos (Blanco Porto, núm. 9)

Roberto Rivas é licenciado en Historia e viticultor desde hai moitos anos. É o presidente da Asociación Galega de Viticultura e forma parte da sociedade cooperativa Viña Moraima.

Esta é a cooperativa máis pequena da denominación de orixe Rías Baixas, e tamén é a máis nova (2006) das 11 adegas asociadas na zona de Barro. Está formada por pequenos produtores que facían viño de cepas centenarias e que se agruparon para pasar ao sector elaborador.

O seu non é só un proxecto económico, senón que tamén buscan a revitalización da viticltura no concello de Barro. A filosofía da empresa é primar a calidade sobre a produción nas dúas marcas que comercializan: Moraima, en homenaxe ao poema de Celso Emilio Ferreiro (o seu proxecto tamén é unha historia de amor á lingua, á terra e á viticultura) e Aba de Trasumia, que veñen de crear este ano.

PROBA EN GALEGO
Xosé Lois Vilar (Froitas Vilar) “Experiencia práctica do uso do galego”
Martes 27 de marzo, ás 21 horas
Colexio de Xestores Administrativos (Blanco Porto, nº 9)

As actividades da campaña Proba en galego, de promoción do galego no comercio local, continúan coa charla de Xosé Lois Vilar, propietario de Froitas Vilar. Dedícase á venda de en tendas fixas e ambulantes, é feirante de oficio, mais estudou historia facendo o itinerario curricular de prehistoria e arqueoloxía. Ademais é un dos maiores expertos de Galicia en materias de arte rupestre e toponimia; tamén participa activamente en escavacións e actos arredor da memoria histórica.

Ten participado en simposios, congresos, charlas sobre toponimia (Santiago, Vigo, Ourense, Pontevedra, Ferrol, Barcelona…), impartindo conferencias en colexios e guiado multitude de visitas arqueolóxico-toponímicas. Esta vertente pedagóxica levouno a publicar con Pepe Carreiro “Os nomes do mar de Baiona a Panxón”.

É membro do Instituto de Estudos Miñoranos e participa en numerosos estudos sobre a toponimia como parte do patrimonio cultural galego.